中環出更：梁太轟蔡子強 論者各有觀點
中文大學政治與行政學系高級講師蔡子強日前就特首梁振英囡囡梁齊昕鎅手事件寫咗篇評論文章，點知就被特首夫人梁唐青儀點名批評為「淺薄、無知、冷血、涼薄」，事件再度成為城中熱話。立法會議員陳志全（慢必）尋日出席電台節目時話，蔡子強篇文本來都冇咩人睇，齊昕鎅手都開始冇咩人講，但梁太鬧爆蔡子強後反而令更多人提番起件事，令事件再度升溫。
慢必指有反效果
慢必話，梁太口講想保護個女，依家反而造成反效果，簡直係一個公關災難。佢又話，有啲嘢想叫人唔好講，最好就係自己收口先，但梁太無喇喇向蔡子強挑機，令人質疑梁太嘅出發點究竟係為啖氣，定係想保護個女呢？議員馮檢基認為，公眾人物面對議論時應予包容。建制派議員蔣麗芸就批評蔡子強篇評論文章中提及嘅「虎毒不吃兒」，係傷害到一名母親。議員田北辰亦都話，公眾人物不須向社會交代家庭事，認為外界應尊重公眾人物嘅家人。
獨立評論人協會尋日都就梁太言論發表聲明，話作為「香港第一家庭」，受到各界關注係人之常情，在外國好平常，又話如果梁太要批評蔡子強，就應該指出佢嘅文章有咩謬誤及與事實不符的地方，而唔係人身攻擊，仲叫梁太他日要留意遣詞用字咁話。
卓妮