慈善基金：洪水毀住所阿松求家電
屋漏偏逢連夜雨，一場大雨幾乎把阿松家園盡毀，不但令電器報銷，部分家具亦被洪水沖走。失去安居之所，阿松平日開工使用的電鑽工具亦被浸壞，暫時無法返回石廠工作。一向自食其力、養妻活兒的阿松直言以往積蓄有限，面對有如廢墟的家園一籌莫展，希望透過東方日報慈善基金呼籲善長施援，以渡過難關。
「一場大雨就沖晒啲黃泥水入嚟，啲水去到膝頭咁高，全屋電器都浸壞晒！」現年五十四歲的阿松與前妻及兒子居於粉嶺和合石村寮屋，憶述豪雨當日家中已有輕微水浸，阿松與前妻正在墊高家具及清理積水，但瞬間卻有洪水掩至，水深及膝，「嗰陣我同前妻都執緊嘢，阿仔就坐喺張床上面，突然間啲黃泥水就沖晒入嚟，成個櫃桶連埋啲舊相都沖走埋，依家咩都冇晒！」
據阿松了解，自去年開始，居所附近疑有人非法堆土，令天然去水系統遭堵塞，遇上大雨，雨水即因無法疏導引致水浸。阿松指現時蝸居混亂不堪，積水與發霉家具孳生蚊蟲，前妻須與兒子到朋友家中暫住。
器具浸壞 被迫暫停工作
在和合石一間石廠任職散工多年的阿松負責修葺石碑，近月石廠生意不多，每月收入已減少至僅有數千元，「呢排公司生意少咗，雖然賺少咗錢，但我唔想拎綜援。」
因長年在石廠工作，阿松指雙手關節即使已出現問題，亦希望自食其力，供養就讀小學的兒子，可惜電鑽等工作工具「已經浸壞晒」，阿松被迫暫時停工，生活頓陷困境。
電腦受損 兒子難做功課
記者到訪當日，阿松便望着滿布泥濘的電腦苦惱不已，「阿仔讀書日日都要用電腦做功課，依家屋企連雪櫃都冇埋，都唔知喺邊度搵番部電腦畀佢！」面對目前困境，阿松苦無對策，希望善長能施以援手，以助解困。
捐款編號：12564
記者楊育輝