《明報》編務董事呂家明未有知會編輯部，七月二日凌晨三點幾鐘自行叫停印刷報紙，將當日報道七一遊行嘅大標題同副標題掉轉，仲將「爭普選」三字換成「七一」，被指係想強調警方清場，將遊行人數同爭普選訴求降溫。
明報職工協會早前強烈譴責呂家明後，國際記者聯會（IFJ）尋日亦發聲明譴責《明報》管理層，話佢哋未經諮詢，刪除頭條標題重要字眼，違反編輯自主咁話。
IFJ聲明話，呂家明係資深傳媒人，難以置信佢會繞過正常程序，立下咁差嘅先例，又話雖然明白編輯部有權決定報紙內容，但係唔代表濫用權力，粗暴干預同埋摧毀報紙嘅編採自主喎。IFJ要求呂家明同《明報》員工直接對話，因為溝通與互信對傳媒行業好重要，最重要係確保事件唔會再有下一次。聯會又促請總編輯張健波提醒包括管理層嘅員工，要維護編採自由同埋遵從既有程序。
其實《明報》近年內部搞到立立亂，點知今次改版風波再惹來員工不滿不特止，仲連國際記者聯會都發聲明譴責，搞到咁嘅地步，除咗成為笑柄之外，真係唔知講咩好喇！