泛民主派立法會議員何秀蘭（Cyd）同資訊科技界議員莫乃光（Charles）獲港府委任為太平紳士，繼衞生服務界李國麟○六年獲委任太平紳士後，再次有泛民主派議員獲委任，但唔少建制派同激進泛民都批評阿Cyd未夠班或唔應該攞太平紳士。對於外界嘅批評，阿Cyd都採取「話之你」嘅態度，皆因佢諗住利用太平紳士個銜頭入監獄做個案方便啲喎，真係咁簡單？
阿Cyd話，自己喺接受太平紳士任命前，都有同工黨中人及其他泛民黨派商量，覺得太平紳士只係銜頭一個，並唔代表以後要事事幫住政府。佢又話，由於太平紳士可以隨時巡視監獄，又可以接觸在囚人士，比以前次次去親監獄都要申請方便得多，所以先決定接受呢項委任，方便佢日後入男女童院搵苦主喎。
聽聞唔少建制派中人都眼紅政府要委任阿Cyd做太平紳士，又覺得佢唔值得獲委任。不過，阿Cyd就話自己對呢啲閒言閒語真係一啲都唔介意，又反寸班建制派，話只要佢哋繼續支持政府，政府一定唔會虧待佢哋喎。話時話，點解班建制派淨係眼紅阿Cyd呢？莫非佢哋唔當Charles係泛民一員？認真耐人尋味。