中環出更:哪吒EQ鬥到上差館

立法會議員葛珮帆(EQ)同西貢區議員方國珊(哪吒),一向都係火星撞地球,事關大家嘅票源都喺將軍澳,前日就發生「哪吒鬥EQ」鬧劇。事緣EQ殺入將軍澳日出康城峻瀅,同食環署人員巡區滅蚊,作為當區區議員嘅哪吒,就連同助理等人狙擊EQ,質問EQ就擴建將軍澳堆填區撥款意向,結果搞到報警收場。

視察蚊患變堆填區爭拗

EQ話,近期收到將軍澳居民投訴蚊患嚴重,於是前日下午三點同食環署落區巡視蚊患黑點,順便滅蚊。當區「城主」哪吒就連同助理十幾人,帶晒橫額及「大聲公」,追住EQ示威請願,要佢交代擴建將軍澳堆填區撥款投票意向。EQ聲稱,哪吒期間襲擊、圍堵佢,雙方有肢體碰撞,其黨友於是報警處理,而警方暫將案件列作刑事恐嚇。

不過,哪吒就反指蚊患源於堆填區,所以追問支持擴建堆填區嘅EQ,要佢遵守選舉承諾。佢又反駁EQ惡人先告狀,屈佢襲擊,又稱佢助理錄低成個過程,懷疑有人涉嫌落假口供喎,相反佢同助理混亂期間都整傷咗手臂,去咗醫院驗傷兼報案。警方發言人話,有關案件由觀塘警區重案組跟進,暫未有人被捕。

卓妮

第一手消息請下載on.cc東網iPhone/iPad/Android/Windows Phone Apps