「民主阿婆」前政務司司長陳方安生前日現身七一遊行「抽水」，並一如以往未有行足全程就玩「快閃」。佢事後解釋遊行隊伍塞咗兩小時都唔郁得，加上落大雨，行到黃昏時分對腳已經抽筋，惟有中途離隊返屋企早抖。不過民主阿婆尋日迅即攤抖夠，應外國記者會邀請出席午餐會，再說三道四談香港普選之路。
不過，民主阿婆喺午餐會向在場外國記者猛呻，英國作為香港前宗主國，更同中方簽署《中英聯合聲明》，回歸後無論道義上抑或法律上都有責任為香港發聲，可惜即使國務院日前發表白皮書，為一國兩制重設框架，英方依然冇聲出，難怪予港人感覺被英國出賣，但偏偏佢對自己多年來唱衰香港隻字不提。
民主阿婆又話，唔明點解警方尋日凌晨就預演佔中拘捕咗五百幾人，予人感覺係「與民為敵」。
講來講去，民主阿婆似乎至今都未表態究竟佔中一旦上演，佢自己會否身先士卒，為下一代「放下身段」佔中呢？