民陣公布七一遊行有五十一萬人上街，但唔少遊行市民有感民怨爆燈，紛紛質疑民陣低估遊行人數。有政圈中人亦批評民陣「篤數」篤開有條路，相反今年篤少咗，同市民心入面個數有落差。有人話，○四年都有五十三萬人上街啦，就算民陣要「篤數」，都應該「齊頭」篤夠五十五萬人，好過依家搞到數字「唔湯唔水」咁。
民陣就解釋數字只係保守估計，部分市民因為天雨、擠塞而中途離隊，呢啲民陣都冇辦法計算在內。佢哋分別派出三隊人定點統計得出平均數，再估算冇行馬路嘅遊行人士比例，因而得出五十一萬人呢個數字。
其實香港大學分別有兩支團隊每年都對遊行人數進行科學統計，大家不妨參考吓。港大社會工作及社會行政學系教授葉兆輝嘅團隊，喺波斯富街同軍器廠街兩個位置點人頭，分別約有九萬人，加上問卷調查發現約三成市民中途插隊而冇經波斯富街，從而推算整體遊行人數有十二萬二千人。
至於港大民意研究計劃統計方法相若，佢哋喺軍器廠街記錄每個時段人數，約有十一萬一千多人，加上去年電話調查同樣得出約三成人冇行經軍器廠街，而推算遊行人數介乎十五萬四千人至十七萬二千人。
講到警方公布嘅九萬八千人，就更加相差得太遠喇。