近年內部立立亂嘅《明報》，昨因一次改版事件再掀風波。明報職工協會不滿編務董事呂家明，喺編輯部員工不知情下，擅自繞過總編輯張健波改頭版標題。
明報職工協會尋晚發表聲明，話呂家明喺昨日凌晨三時，未有通知其他人情況下，擅自叫停印刷部運作，然後將《明報》頭版原有標題「爭普選大遊行、人數10年創新高」改為副題，又將「爭普選」三字換成「七一」，而原有副題「數百預演佔中、警員抬人清場」就變成大標題。協會強烈譴責呂家明干預編輯部運作，淡化遊行「爭普選」的主題，認為咁做開咗危險先例。
其實前晚唔少報館都改版，加上警員清場相片同文稿，所以停機改印唔係乜嘢咁大件事。最大問題係協會覺得呂家明身為編務董事，原來無權改任何標題。
奇就奇在，既然呂家明無權咁做，印刷部又點解咁輕易被佢叫停呢？真係夠晒奇怪，亦再次證實《明報》內部立立亂係不爭事實。