中環出更：長毛踎監 吸金力更強
七一遊行錄得近年最高紀錄嘅五十一萬人，連帶唔少政黨籌款豬籠入水。有「丐幫」之稱嘅社民連由年頭到年尾都唔夠錢用，每次遊行都係佢哋嘅「提款機」，但偏偏主席梁國雄（長毛）喺上月被判入獄四星期，今個星期六先出獄，無得喺街站做生招牌叫人捐錢。正當大家以為社民連籌款能力大減時，佢哋就公布前日合共籌到九十三萬元，吸金能力冠絕一眾政黨，長毛真係喺獄中等收錢。
七一籌款 社民連冠絕政黨
社民連喺成個遊行街站乜都無賣，淨係掛住一幅印有長毛變短毛，兼扣住手銬嘅特大海報。社民連副主席吳文遠話，原先佢哋都以為無咗長毛，籌款收入會少咗一截，點知最後竟然仲比往年六十九萬多出一大截。不過，其他政黨籌款都跌咗唔少，公民黨籌到四十一萬元，民主黨同工黨就只有約二十萬元。
至於佔領中環街站就籌得一百三十九萬元，比往年多出接近六十萬元，學民思潮亦籌得一百三十一萬元，而民陣則未有籌款數字。
卓妮