中環出更:拉布戰唔放飯 建制扭計

七一遊行後,有逾五百名示威者因為非法留守中環遮打道,而被警方抬走及拘捕,並送往黃竹坑警察學院辦手續,據稱呢批示威者一直冇飯食、冇水飲。不過,尋日喺立法會開大會嘅建制派議員都因為泛民主派不斷以點算開會法定人數「拉布」,搞到連午飯都冇得食,講到好似衰過示威者被扣留喺黃竹坑警察學院咁,紛紛要求主席曾鈺成放飯,但主席不為所動,叫議員用十幾分鐘快快食完餐飯。

尋日立法會會議開始十幾分鐘,議員范國威同「慢必」陳志全已開始輪流點人數,而建制派又唔生性,唔乖乖坐喺會議廳內,令泛民有機可乘,短短一個鐘頭內先後四次要求點人數,搞到建制派議員頂唔順逐一向曾鈺成投訴。直至午飯時間,建制派紛紛要求主席放飯,或容許議員帶碟飯入會議廳食,議員黃定光同方剛更加話自己連早餐都未食,認為主席應該為同事健康着想放飯。

「快食慘過唔食」

不過,主席就話身為議員應有智慧安排自己用膳時間。議員田北辰(田二少)此時就加入戰團,話基於人道立場,希望主席宣布休會放食飯,又話責任心太重,唔可以唔開會喎。主席就話,議員其實可以用十幾分鐘食完餐飯,依家係非常時期,應該用非常習慣。田二少反駁,最近醫生同佢講,話食飯唔可以快,否則仲慘過唔食。主席就指田二少去廁所都可以分兩次,點解食飯唔可以分幾次食喎,隨即哄堂大笑。

張華峰被擺上枱

商界林健鋒就擺金融服務界張華峰上枱,話張熱愛議會工作,擔心流會唔敢外出食飯,如果冇飯食就會腳軟,一旦跌倒都扶唔起佢。不過,主席就指張華峰仲精神過林健鋒。過咗冇耐,議員陳偉業又要求點人數,田二少終於向現實低頭,話決定嘗試用十五分鐘食個快飯再返嚟。其實班議員條氣好唔順,但到頭來都係要死死地氣接受現實。

卓妮

第一手消息請下載on.cc東網iPhone/iPad/Android/Windows Phone Apps