政情：黃國健撤得慢捱鬧

論退保嚴肅 唔想得個吉

立法會尋日朝早九點正續會，開波唔夠一分鐘，人民力量陳志全（慢必）就要求主席曾鈺成響鐘點算開會法定人數，響到超過十三分鐘，議員梁志祥匆匆趕到，勉強湊夠法定人數。不過，當KK講咗十分鐘左右，就話由於港大社工及社會行政學系講座教授周永新明日會就退休保障發表研究報告，認為自己嘅動議無迫切性，決定撤回動議辯論不作討論，曾鈺成於是宣布散會。

KK喺會後話，人民力量近兩星期不斷要求點人數，令立法會淪為「點鐘遊樂場」，大大浪費時間。佢話退休保障係一個嚴肅嘅議題，擔心個會開開吓又要停低點人數，搞足成朝都係得個吉，因此決定撤回動議，等埋周永新份報告先再算。咁佢係咪早幾日已經決定要撤回動議呢？KK話，佢尋日朝早先至決定撤回動議，事前冇同其他建制派商量，並強調自己都覺得好無奈喎。

元朗趕出嚟 梁志祥無奈

不過，無奈嘅並唔只得KK一人，梁志祥臨時臨急跑入會議廳，話大欖隧道非常塞車，令佢遲咗返立法會，點知當佢一仆一碌咁行入會議廳，就有工聯會議員問佢做乜趕返嚟，搞到佢初時都唔明對方講緊乜。佢話如果KK一早肯喺前晚決定撤回議案，咁其他議員就唔使咁慘一早趕返到立法會，而佢都唔使山長水遠喺元朗趕出嚟。

有份就KK議案提出修正案嘅工黨張超雄，就對KK撤回動議感到可惜，佢話原本寫咗份好長嘅講詞，揭示未來基金可能會出現嘅問題，但依家都無機會提，覺得有啲失望喎。