中環出更：演藝畢業生 當林鄭透明
香港演藝學院尋日舉行畢業禮，藝術家脾氣向來難以觸摸，今年畢業生就秉承師兄師姐去年向特首「示威」手法，向代特首主持今年學位頒授儀式嘅政務司司長林鄭月娥大舉「交叉」手勢、「掂行掂過」唔按慣例向林鄭鞠躬敬禮、尖叫「媽咪我畢業喇」、玩自拍，返到台下仲撕毀寫有「白皮書」字樣嘅卡紙，以及高歌「佔領中環」歌曲《問誰未發聲》，總之當林鄭透明。
示威學生主要來自戲劇學院、電影電視學院同舞台及製作藝術學院，佢哋趁逐個上台嘅短短幾秒時間大玩「行為藝術」，除咗向林鄭舉「交叉」手勢，有學生仲背向林鄭改向台下嘉賓鞠躬，亦有學生向林鄭行軍禮、尖叫、企定定怒睥佢，甚至索性當林鄭透明，喺台上大玩自拍，贏得同學陣陣歡呼、尖叫聲，以羞辱林鄭為榮，難為林鄭仲笑得落。
院長失望又傷心
有教授就開腔要求學生尊重場合及前來觀禮嘅家長、朋友，而演藝學院院長華道賢（Adrian Walter）亦對學生嘅行為感到失望和傷心，希望學生表達意見要注意場合。不過，學生一於少理，仲趁林鄭離席前喺台下高唱《問誰未發聲》，又高舉「官逼民反」紙牌同撕毀「白皮書」字樣嘅卡紙，校方急急護送林鄭返落台下欣賞表演。喺台上怒睥林鄭嘅游同學坦言，向林鄭鞠躬反而係唔尊重自己，惟有以敵視佢嘅方式表達不滿。
事實上，學生一連串「行為藝術」係即興發起，背後冇組織性，主要表達對政府整體不滿，而佢哋代表藝術界，自然特別關注西九文化區落成情況，要求政府加快落成文化區，同撥更多地方畀佢哋訓練同表演。不過，林鄭頒獎後極速走人，有冇聽入耳真係唔知喇。
卓妮