恒基地產主席李兆基日前話有意捐出石硤尾大坑西邨地皮予政府興建資助房屋，身兼深水埗區議員嘅立法會議員馮檢基（阿基）尋日朝早就在電台節目上話，佢已就大坑西邨居民嘅安置問題，分別聯絡咗運輸及房屋局局長張炳良及李兆基，引述雙方話之後會作回應，仲言之鑿鑿話雙方態度積極添！不過，張炳良尋日下午就出嚟澄清話，呢幾日佢都冇同阿基傾過大坑西邨嘅問題，強調現階段當局不適宜評論此事。咁就奇喇，究竟阿基同邊個「張炳良」講過呢？唔通佢同電視機內嘅張炳良講過件事？
