今年民陣搞完七一遊行之後，學聯等激進泛民主派好大機會大搞佔領行動，令唔少人都好關注，究竟佢哋會選擇喺邊度搞佔領。學聯中人就話，至今選址或者會轉至中環街頭，因為機動性較高。除咗選址外，據聞佢哋都諗緊點樣「吸客」，有人講笑咁話，七一前後正值巴西世界盃賽，話唔定抗爭期間播場球賽，參與留守嘅人都會多啲喎。
學聯早前講到明，今年「六二二」投票後，如果政府對公民提名冇明確回應，七一前後就會發起佔領行動。學聯中人話，考慮喺邊度佔領，首要諗目的，之後先諗難度。立法會經過上星期「被佔領」後，相信要再攻入都有困難，所以未必會考慮。至於政府總部，大部分係辦公室，攻到入去意義不大。佢哋又諗過特首辦，但易守難攻，入唔入到去都成問題。
所以學聯好可能最後會轉去民陣遊行後嘅集會地點，即係中環遮打道。雖然呢個方案機動性大，但警方會大條道理，即時清場，對學聯嚟講，真係有辣有唔辣。至於留守之後做乜？有學聯中人話，或者可以喺凌晨期間播放世界盃賽事吸客，事關唔少抗爭者都係男丁，話唔定可以鞏固呢班抗爭者。不過，如果真係要播放賽事，就要解決版權問題，而凌晨睇完波，班人仲有冇氣力抗爭呢？