由「貪曾」前特首曾蔭權爵士○五年成立盛事基金，只可惜令納稅人就大使冤枉錢，事關除咗睇唔到盛事基金點樣令香港成為亞洲盛事之都，最近還被審計報告揭發基金資助多宗疑似篤數嘅活動，相信基金評審委員會委員實在難辭其咎。不過，政府竟然當審計報告透明，亦懶理社會對基金運作嘅批評，尋日公布基金全體委員再獲委任兩年，認真離晒譜！
政府尋日公布新一屆盛事基金評委會委員名單，點知主席一職由身兼行政會議成員嘅商界議員林健鋒再度連任，其他非官守成員除咗新增一名有會計背景嘅人士外，其他舊委員全體冧莊，任期一律延至一六年中。
大家係咪覺得好出奇呢？莫非政府諗住立法會政府帳目委員會依家聆訊緊基金單醜聞，驚一旦換走晒班成員，倒頭來會冇人問責？
曾經做過廉政公署調查員嘅白鴿黨總幹事林卓廷都話，基金涉及咁多可疑帳目、誇大成效且有利益衝突，尤其林健鋒明顯疏於監管，政府唔單止唔向佢哋問責，反而再委任全部成員，真係好荒謬，完全係摑咗審計報告一巴囉！講到底，一個冇作用又有咁多負面新聞嘅基金，仲留喺世上做乜吖，不如摺埋好過啦！