政情：剪布還須星爺硬
激進泛民主派先後喺立法會大會、工務小組、人事編制小組及財務委員會發動「四線拉布」，隨着立法會主席曾鈺成「揮剪」將修正案「剪」剩一半，工務小組主席盧偉國（WK）、人事編制小組主席葉劉淑儀同財委會主席吳亮星（星爺）亦紛紛跟隊「剪布」，要求「劃線」終止辯論。WK同葉太主持嘅委員會已先後成功「剪布」，可惜星爺「洩氣」累事仲未成功，難怪建制派議員臨時召開集思會暨「批鬥大會」，諗計「剪布」之餘，仲要求星爺「硬起來」！
立法會秘書處尋日下午突然發電郵通知財委會委員，指主席認為新界東北發展前期工程撥款項目已有充分討論，決定今日會議開始即刻表決陳偉業提出嘅議案，隨即表決埋撥款項目。星爺可唔可以成功「剪布」仲未知，但據悉星爺呢招「快刀斬亂麻」，查實背後由建制派議員親自督導。
政府都對星爺失望
財委會上星期第五次開會，都未能就新界東北發展前期工程撥款進行表決，「拉布」議員除咗多次要求涉利益衝突嘅星爺避席，仲當面手指指「警告」會挑戰星爺嘅劃線決定，完全被泛民住嚟打。不過，隨着「拉布」主力梁國雄（長毛）被判囚，多個項目亦已交財委會「排隊」表決通過，建制派眼見「剪布」實在係十萬火急，決定開會商討對策。
據了解，建制派議員喺集思會上不留情面咁「圍剿」星爺，不滿佢堂堂財委會主席議而不決兼EQ低，遇着泛民「挑機」仲嚇到縮沙唔敢「剪布」，唔畀泛民玩殘就假嘞。建制派因此決定先發制人，要求星爺今日一開會就表決，極速「剪布」，總之「不成功、便成仁」。
其實激氣嘅又何止建制派呢，據聞政府對星爺都相當失望，想當年以為由建制派「坐正」多個委員會正、副主席可以幫輕吓政府，點知重要性僅次大會嘅財委會，好揀唔揀竟然畀星爺坐正，兩年就搞出呢個大頭佛。