中環出更：高永文被投訴「雙行泊車」
政府呢個「熱廚房」唔易做，做出名嘅局長更容易被市民認得，真係有辣有唔辣。好似食物及衞生局局長高永文除咗民望高，好多人仲知佢呢位潮州籍局長好鍾意食家鄉菜，尋日就有位中五學生喺十二點半放午飯時候，見到高永文現身九龍城龍崗道一間佢經常幫襯嘅潮州菜館。
食晏畀中學生認得
原本高永文去幫襯開嘅「飯堂」食晏冇乜問題，但呢位學生就見到高局長率領同事入咗菜館後，佢架政府座駕就喺菜館對開馬路第二條線double parking（雙行泊車）。雖然高永文嘅座駕並冇阻塞交通，而且亦有司機在車上等候泊位，但呢位學生就覺得作為局長應該要以身作則，落咗車之後就叫司機駛走部車，唔好阻街喎。
食衞局發言人就話，要同司機了解吓當時情況，至於高局長當時係出席一個飯局，仲食咗滷水鵝同牛丸等招牌菜。其實自從高永文做咗局長後，日日喺金鐘政府總部返工，估計佢都唔係經常去九龍城開餐，但咁都被人撞到兼認得佢，真係唔知佢高民望係好事定壞事嘞。
卓妮