中環出更：父親節前特訓囝囝 啟剛想聽「爸爸」
嚟緊星期日就係父親節，政商界唔少身為人父嘅才俊都好期待成為當日主角，其中香港青年聯會（青聯）主席霍啟剛去年升呢做爸爸，坦言相當期待今年有囝囝中曦為自己慶祝。雖然中曦只係九個月大正牙牙學語，但啟剛話已經連日為佢進行「特訓」，不停喺佢面前叫「爸爸」，希望中曦趕得切喺父親節當日叫佢一聲「爸爸」喎！
卓妮尋日中午行經上環信德中心，撞見啟剛行色匆匆兼「低頭族」上身掛住手機，唔知有咩緊要事要做呢？原來佢咁心急係趕住去食晏「祭五臟廟」，之後隨即返內地開會。難得撞到，梗係趁機八卦吓佢點樣迎接首個父親節啦，平日中港兩邊走嘅啟剛就透露，已經同內地嗰邊「攞假」，申請當日朝早就返港過節。除咗期望中曦叫聲「爸爸」，佢仲許下宏願，講緊嘅唔係要佢日後飛黃騰達，而係學識做人之道。
啟剛慨嘆，唔少內地以至香港嘅父母都當仔女係金叵羅，廿四小時圍住佢哋氹氹轉，但佢自細離開父母、喺英國寄宿學校長大嘅經驗，睇到自己由連床單都未摺過嘅「港童」，蛻變成今日嘅大男人。
晶晶焗做「醜人」
正因為咁，佢期望中曦唔好喺保護罩下成長，會放手畀佢自立，唔好做「以為西瓜係紅色」嘅港童。至於會否跟隨自己步伐放洋讀書，相信仲言之尚早。
父母通常都有分「醜人」同「好人」，一方負責教仔，另一方就負責氹番。呢方面啟剛就爭住做「好人」，「醜人」角色就由太太郭晶晶「硬食」喎。啟剛解釋，每日返工已經咁辛苦，返到屋企梗係想享受天倫之樂，唔想再硬起心腸訓導囝囝，但佢同時堅持要中曦自立，相信「好人」難做喎！
卓妮