政情：今日你上鏡：馬斐森「點睛」

在爭議聲中上任香港大學校長的馬斐森（右二），上場已有三個月，唔少人對佢上任後嘅情況都甚感興趣。咁啱三年一度嘅當代社會喪親與哀痛國際會議今年首次喺亞洲舉行，逾千名世界各地參與生死教育研究嘅學者尋日聚集港大參與論壇及交流，記者們當然趁機要求馬斐森交代吓近況啦！點知馬校長仍然「封口」，公關竟然話佢仲係太新，未係時候同傳媒傾偈喎，莫非要等佢卸任嗰陣先至係時候？雖然馬校長唔肯開金口，但就為在場表演嘅舞獅點睛做騷，唔知佢幾時會為港大「點睛」，挽救港大排名急跌嘅危機呢？