政情：中環出更：縱容阿基宣傳 梁君彥「撞板」
立法會尋日開大會辯論係咪引用《立法會（權力及特權）條例》調查高鐵延誤事件，泛民主派議員馮檢基竟然喺座位上展示咗幫佔領中環行動催谷六二二投票嘅「毅行爭普選」活動宣傳紙板，結果被建制派投訴同會議議題無關。不過，當時暫代主席職務嘅梁君彥（Andrew）就縱容阿基繼續擺放有關宣傳品，但到主席曾鈺成歸位後，隨即裁決要求議員收回宣傳板，簡直係摑咗Andrew一巴。
建制派投訴
話說陳鑑林（橄欖）在會上投訴阿基嘅展示品同討論高鐵延誤無關，阿基就解釋，有普選先令高官問責制做得好，工程先至唔會亂上馬，大家先可以喺高鐵延誤呢啲大事件上搵出真相。對於呢個咁牽強嘅解釋，Andrew竟然咁都收貨，難怪惹來建制派不滿，等曾鈺成返回會議廳主持會議時就再度投訴。最後曾鈺成作出裁決話，雖然議題同普選與管治有關，但就拉得太遠喇，而且展示板唔係講普選重要性，而係宣傳一項活動，所以要求議員收回枱上嘅宣傳板，而泛民只好乖乖收番埋啲宣傳板。
卓妮