中環出更：文藝茶敍 名家苦水浸德成
本地文化藝術界人士一直批評，負責文藝政策嘅民政事務局局長曾德成淨係識得出席埋啲開幕剪綵活動，以及每周做一次「鍵盤戰士」，透過寫網誌同外界「神交」，甚少同佢哋面對面坐低認真傾談。不過，卓妮尋日行經金鐘，就發現多位音樂、舞蹈同演藝名家雲集政總內嘅一間餐廳，同曾德成摸住茶杯底有傾有講，原來局長今次「破格」廣邀相關業界嘅人士出席茶敍。據知多位業界代表都趁機向局長大吐苦水，勁呻本地藝術界嘅訓練、表演場地都唔夠，促請局長解決呢個老問題。
卓妮尋日行經政總內嘅社企餐廳，見入面人頭湧湧，細探下見到本身為國際聲樂名家嘅藝術發展局音樂組主席費明儀、資深演員劉兆銘（Ming Sir）、以及芭蕾舞學會主席鄭瑤璋（Ada）等人，之後仲見到多名民政局同康文署高官，非常熱鬧。
訓練表演場地不足
Ada茶敍後向卓妮透露，尋日係佢第一次同曾德成直接交流，好多業界代表都向局長反映業界訓練、表演場地不足嘅問題。佢明白香港地價同租金高昂，場地問題好難解決，但都希望政府明白佢哋嘅處境，唔知局長收唔收到呢？
費明儀就笑言，平日出席活動成日都見到曾德成，但真正交流都係第一次，希望政府為佢哋提供更多發展空間，尤其要畀年輕業界發揮機會。不過由於業界代表太多，費明儀最後都搵唔到機會同局長詳談，認真可惜。
據知民政局尋日搞呢個茶敍，主要想藉非正式場合同業界輕鬆交流，仲話希望呢類型嘅茶敍可以長搞長有，做到每年一次。
至於曾德成離開時，就繼續耍官腔，話局方會認真考慮業界意見，然後就極速鬆人。計卓妮話，淨係聽意見冇用嘅，要真係解決到場地不足嘅問題先得，否則搞多一百次茶敍都係嘥氣。
卓妮