政情：夏千福又騷相博讚
美國駐港總領事夏千福與英國駐港總領事吳若蘭等八國領事，早前組成「小八國聯軍」到深水埗巡區，疑似為最近愈來愈少落區嘅特區高官代勞。兩人之後各自各精彩，吳若蘭高調會見咗多名負責對港政策嘅中央官員，又喺官邸大請泛民議員食早餐，到近日又輪番到夏千福表現活躍，「接力」到柴灣參觀啤酒廠，又去頒獎又去睇扒龍舟，旋即贏得上千名網民讚好，威過好多特區高官同中央駐港官員。
參觀柴灣啤酒廠
夏千福日前喺社交網頁，上載咗佢到柴灣參觀一間美資精釀啤酒廠嘅圖片同感想，有人留言指若非夏千福親自參觀推介，佢哋住咗咁多年，都唔知香港有間咁嘅啤酒廠。有網民更建議佢去上水去實地視察水貨客運作，然後再就限制個人遊旅客問題發表美方意見。
中大校長沈祖堯最近獲頒傑出學者獎，夏千福唔知點解又做咗頒獎嘉賓。尋日夏千福又去咗尖沙咀睇龍舟賽，好似無處不在咁樣。我哋班特區高官有佢咁積極主動就好囉！