政情：公民講場：德成搵波封口

每逢世界盃，唔少球迷都日日掛住睇波，工作、學業、家人乜都唔理。民政事務局局長曾德成尋日出席一個世界盃活動時，記者問佢接連有反圍標居民收到恐嚇信，負責樓宇管理政策嘅佢會唔會親自見吓班居民？曾德成就推說恐嚇信屬於刑事罪行，警方會作出跟進。問佢點睇前新華社香港分社社長周南有關佔中嘅言論，佢就以「我哋今日談足球」嚟打發記者，點都唔肯多講半句。記者轉為問番佢有關足球嘅問題，提及有地區球隊不滿民政局有意終止「鳳凰計劃」唔再資助佢哋，曾德成又話等佢哋稍後見完面先再講，真係問佢都嘥氣！