政情：西九爛攤子推畀老臣子
籌備十六年嘅西九文化區計劃「衰收尾」，依家都唔知幾時先可以完成晒三期工程，呢個「爛攤子」總要有人啃咗佢，據聞港府有意趁再次委任西九文化區董事局成員時順水推舟，一方面打破不成文嘅「六六原則」，委任三名西九董事局「老臣子」，即夏佳理、羅仲榮同盛智文再坐一會。
三人留低保延續性
不過咪以為留低嘅西九老臣子好易做，有傳盛智文留低係另有重要任務，就係為咗未來數年後，預備接手西九呢個盪手山芋喎。
西九文化區於○八年獲立法會一筆過撥款二百一十六億元，港府同年委任十五名西九董事局成員，其中十一人做足六年，包括夏佳理、羅仲榮、盛智文、榮念曾、林健鋒、單仲偕、葉詠詩等人，按照「六六規定」，即同一公職不可擔任超過六年規定，以上十一人都「夠鐘」走人。
據聞政府內部反覆研究後，擔心西九董事局一次過大換血，無晒熟悉西九人士坐鎮會缺乏延續性，因此決定叮走大部分「夠鐘」嘅董事局成員，只破例續任夏佳理、羅仲榮同盛智文三人，底因係睇中佢哋各有專長，做好新舊交替工作。
盛或將離海洋公園
除此以外，消息指政府嘅另一盤算係，西九文化區現時由政務司司長擔任董事局主席，但法例無規定一定由政府中人出任，加上西九係潛在政治大炸彈，政府一直有意將西九「外判」出去，據聞盛智文係其中一個可能人選，加上盛智文年底好大機會卸任海洋公園主席一職，由副主席孔令成頂上做海洋公園一哥，到時盛智文更加有心有力全程投身西九工作，政府就可順勢將西九呢個歷史包袱推畀盛智文，究竟政府呢個如意算盤係咪打得響，就要睇吓有幾大決心將之變成事實嘞！