中環出更：屯門藥房開張 遭本土派踩場撒溪錢
人民力量一向反對太多內地旅客來港，認為會引發水貨客問題，影響本地居民生活，其中人力主席袁彌明，最近仲大力反對將海怡西商場改做名店散貨場，不過同人力關係密切、自己亦經常喺網台批評個人遊及一簽多行政策嘅蕭若元，近日就喺屯門開咗間藥房，畀本土派人士質疑一面鬧「蝗蟲」，另一面又賺內地人錢。
尋日間藥房大搞開張儀式，除咗邀請到多位靚仔靚女藝人撐場，亦吸引咗一批本土派示威者踩場示威，高舉港英旗同「藥丸助長自由行，串連蝗蟲害港人」、「屯門不要名人藥房」等橫額，喺藥房對面大叫「蕭若元，落地獄！」
當蕭若元等人行出藥房門口切燒豬時，示威者更一湧而上，大撒溪錢，又用粗口大鬧蕭若元，場面混亂。事後幾位女藝人齊聲喊驚，話要用碌柚葉沖涼驅邪喎！
蕭若元承認間藥房佢持股四成，出咗三百幾萬，只係一盤小生意，又聲稱自己做藥房有三大原則，包括以做配藥為主，唔做水貨同唔會儲存太多奶粉喎。唔知喺去佢間藥房買嘢，係咪要出示身份證證明港人身份嘅呢？
卓妮