中環出更：名人愛錶顯示風格
尋日沙田馬場星光熠熠，事關有名錶盃賽舉行，城中名人梗係齊齊入場曬靚錶啦。照道理身為主人家嘅太子珠寶鐘錶主席鄧鉅明（Jimmy），擁有嘅名錶一定多到戴唔晒，點知佢竟然冇戴手錶出席喎！卓妮當然要問吓點解啦。原來佢哋代理嘅名錶牌子有成十個咁多，但佢只得一對手，無論佢戴邊一個牌子，都會得罪晒其他九個，所以都係費事戴嘞。
Jimmy又話，自己從事賣錶生意，太太鄧宣宏雁自然唔會送錶畀佢，因此對佢嚟講，冇一隻錶係唔可以賣嘅。不過佢家中亦存放咗十幾隻名錶，原因唔係佢特別鍾意，而係純粹因為佢曾經戴過，冇理由賣啲二手貨畀客人。
女士多愛鑽錶
另外，創興銀行副主席兼董事總經理梁高美懿（Margaret），就直認好鍾意買靚錶，多到保險庫、夾萬同櫃桶都有！問佢會唔會留番幾隻珍藏畀仔女，佢就話唔需要喇，因為佢哋一家人一向都輪流攞啲錶嚟戴，而佢每次買錶都會帶埋佢哋去幫吓眼，隨時啲子女仲清楚過佢，知道晒屋企有咩存貨。Margaret提到，佢初初出嚟做嘢時，已經喺瑞士買咗隻名貴勞力士嚟威吓，仲強調隻錶嘅價錢與佢當時嘅收入相稱，暗示自己當時人工已經好高。
同場仲有教育局前局長孫明揚與太太鍾小芬、富士攝影器材主席孫大倫（Dennis）伉儷等。卓妮見鍾小芬戴住條頸鏈咁搶眼，問佢係咪老公送嘅，孫公即時搶答，話太太買嘅嘢咪即係佢買嘅嘢，佢仲大爆太太好醒目，次次問佢係咪又掃咗批新貨，太太都會話買咗好耐喇，之前冇戴之嘛，真係畀佢吹脹！Dennis就同太太一樣好有品味，佢哋喺讀書時相識，之後一畢業出嚟工作，就互相送咗一對卡地亞手錶畀對方，尋日兩人戴住嘅手錶亦非常合襯，羨煞旁人。
而太子珠寶鐘錶執董朱繼陶嘅太太朱鄧麗萍，以及梁智鴻嘅太太馮令儀，都話買錶最緊要唔係名貴，而係要款靚。朱太仲話，好多女士都鍾情有鑽石嘅錶款，貪佢夠閃，而且愈誇張愈好，否則戴咗都冇人留意到就嘥心機！
卓妮