立法會一個小組尋日開始審議有關成立創新及科技局嘅修例建議，商務及經濟發展局常秘何淑兒表示，立法會一通過有關修例同開位撥款建議，新政策局十四日後就可以正式成立。有議員質疑當局能否喺短短十四日內搵到局長人選，定係一早已「度身訂造」欽點咗某君。其實成立科技局嘅建議，早喺兩年前現屆政府仲未就任時提出，當時已盛傳搵咗理大副校長楊偉雄擔任局長。如果人選中途冇變，即係楊偉雄已經足足等咗兩年，唔好話等多十四日，即日公布都應該冇問題。
