政情：盲毛亂響鐘 泛民聲討
俗語有云，不怕神一樣的對手，只怕豬一樣的隊友。前晚大約九時半，立法會仲有半個鐘就安安樂樂休會待續時，外號「正盲毛」嘅公民黨議員毛孟靜，無喇喇舉手要求響鐘點算出席人數，由於佢班泛民盟友，大部分人都去晒維園出席六四燭光晚會，即使有幾位議員一仆一碌咁趕返立法會，最後仍以一位議員之差宣告流會。事後唔止建制派譴責「正盲毛」嘅行徑，連佢班泛民盟友同黨友，亦齊聲質疑佢「厚多士（好多事）」亂響鐘，決定喺今日嘅泛民「飯盒會」跟進事件，聲討「正盲毛」。
前晚六四廿五周年撞正立法會大會，令晚間流會嘅機會大增，因此建制派與泛民內部早有默契，喺立法會表決完預算案同加煙稅草案後，雙方都唔會玩突襲，等班泛民議員可以專心落維園，建制派亦可安心返屋企瞓覺，等翌日朝早復會後再砌過。
點知當來自泛民陣營嘅新同盟議員范國威，開始就佢動議嘅特權法查高鐵延誤議案發言時，因為自己有一項修正案而被迫留守立法會嘅「正盲毛」，突然要求響鐘點人數，當堂嚇到范國威及同樣冇落維園嘅公民黨黨友陳家洛呆咗，因為當時會議廳內只有十多名議員，就算個個識得一分二，都唔夠三十五個議員嘅法定開會人數。
議員飛撲回立會救唔番
泛民同建制之後陸續有人趕返立法會，包括由維園急急腳仆返嚟嘅民主黨胡志偉，以及差啲就上咗巴士返屋企嘅工聯會郭偉強，可惜郭偉強跑得唔夠快，最後遲咗約五秒步入會議廳，阻止唔到呢場歷來最無聊嘅流會鬧劇發生。
事後「正盲毛」仲死撐話，因為特權法查高鐵議案好重要，佢擔心建制派會喺泛民去晒維園期間突襲投票，先至要求響鐘，又指摘建制派唔齊人先會導致流會，但實情係前晚缺席嘅大多為泛民議員，亦根本冇建制派諗過突襲。
除咗胡志偉同郭偉強，「正盲毛」亦連累佢位黨魁梁家傑同時被建制與泛民責難，炮轟佢冇管好自己啲黨員。我哋尋日問梁家傑點解「正盲毛」要響鐘，佢就無語問蒼天咁答：「我都想知點解！」
不過亦有議員指出，其實前晚響鐘時，建制同泛民都仲有議員身處立法會，包括另一公民黨議員郭家麒，懷疑當中有人故意唔返會議廳，等「正盲毛」孭鑊。郭家麒承認佢曾經由維園返番立法會，之後再重返維園，期間冇留意到有人響鐘喎，真係信不信由你。