中環出更：開會睇嘢設限 官員抄書消磨
財政預算案喺立法會遭遇拉布，開會時間流流長，真係難為一眾枯坐嘅政府官員。我哋聽聞，政府驚啲官員無聊得滯，亂咁上網睇嘢，發生類似教育局局長吳克儉喺議會廳睇股票，或者白鴿黨議員何俊仁用平板電腦睇艷照等事件，所以向官員發出口頭指引，叫佢哋唔好亂睇嘢，結果搞到官員動彈不得，有人索性抄《議事規則》消磨時間，勁搞笑。
吳克儉（目及）股票出晒醜
聽聞指引要求官員唔可以瞌眼瞓，唔好用手機或平板電腦睇同大會無關嘅嘢。心水清嘅人都記得，除咗吳克儉上網偷睇股票走勢之外，前教育統籌局局長李國章亦曾經開會時打機耍樂，所以呢啲溫馨提示真係唔怕講多幾次。唔畀玩，咁睇文件實冇錯喇！但係指引又話唔好睇機密文件，事關如果地政規劃官員攞張地圖出嚟睇，唔覺意指住某地區或某幅土地，容乜易被人話放水畀發展商喎！
結果班高官做乜好呢？聽聞有人就趁機咪熟《議事規則》，有啲就抄寫練字，唔係又點力抗周公嘅呼喚？
卓妮