稚童語淒酸 鐵漢淚偷彈
【本報訊】血的家庭悲劇，引發淚的感觸和反思，一段「探員感言」猶如情感炸彈撥動心弦。小莉莉變成家變的犧牲品，聞者心酸：「孩子何罪？」當差廿六年的重案組探員，見慣血腥兇案，但這宗案件令他刻骨銘心，完成工作後心情久久未能平復。作為一名警員、孩子的父親、妻子的丈夫，他面對眼前場景，感觸萬分流下男兒淚，寫下段肺腑感言，寄語所有人要「珍惜眼前人」。
重案組探員徹底蒐證，既要工作又要承受心理的衝擊。當差廿六年的探員事後撰文抒發感想，「接過無數咁多單老謀（謀殺案），呢單最心酸，響現場一路做一路想喊，個妹妹好得意，畀媽咪響條頸度斬咗十幾刀，個頭爭啲甩，事發時哥哥響屋外。」
他又寫到：「無論身形和年紀，都同我細仔好似，個細路好乖好平靜，好詳細咁答我哋問題，我好唔忍心問」，父親早已失蹤，一夜之間痛失親妹，母親又要面對無限期的醫院令，不禁擔心他的將來，問男童：「肚餓嘛？」時，他回應：「叔叔，其實我餓的，但我食唔落。」他聽到後「個心好痛，我入屋幫佢執啲替換衫褲時，佢仲提我可唔可以幫佢執埋套運動衫，我聽日要上運動堂。我當時真係擰轉面，啲眼淚忍唔住流咗出嚟。」
老差骨寄語「珍惜眼前人」
文中又提到準備收隊時：「我坐在疑兇張床度，（因為成屋血，我實在搵唔到其他地方坐），望住妹妹的衫仔鞋仔，玩緊的積木散落一地，好似代表頭家一樣，散」，「個心好痛好痛，小朋友有咩罪？」最後他希望所有人明白「活在當下，要珍惜眼前人」。