政情：保安局民記疑打籠通

呢份「文件」上面寫住尋日討論嘅三大議題，包括警隊鼓勵社區參與防罪工作、科技罪案組升格、統一審核機制，點知愈睇愈好笑，最矚目係保安局竟然教埋民記議員點樣問問題。建制派議員中英文差就聽過啫，點知原來問問題都唔識，真係令人搖頭嘆息。

「私人醒」文件 惹泛民不滿

其中涉及處理酷刑聲請嘅「統一審核機制」，保安局就提供埋口語化跟進提問，教民記議員問：「我覺呢個新制度係高度公平，但只係對聲請人高度公平，對香港納稅人就高度不公平」，仲話：「一個人如果真係走難，應第一時間申請協助，但資料顯示，佢哋平均嚟咗十四個月先提出聲請，點講都唔通，我想知點解佢哋唔係第一時間出嚟提出聲請？」

另一條標準問題就問：「佢哋留係香港成十四個月之後，先提出聲請，咁呢十四個月佢哋做緊咩？以咩為生係咪打黑工？」又有一條問題教議員問：「如果有理由相信有人係濫用呢個制度，例如拖咁耐先提出聲請，之前又喺度做黑工，政府會唔會考慮收緊程序，例如點解規定有成二十八日咁多時間去交表格？」可以話係有晒指導思想。

長毛即時問保安局局長黎棟國份嘢係咪政府提供，點解淨係畀民記，其他政黨同議員都冇，覺得好唔公平，點解要友好政黨假扮民意問問題，手法卑劣，唔尊重議會。議員郭榮鏗亦指官員不應偏袒任何議員；議員張超雄亦指曾多次約見保安局官員都冇下文，但民記就有「私人醒」嘅文件；委員會副主席涂謹申話政府唔可以要求議員發問。

局方不認 指議員決定用途

文件擁有人梁志祥就澄清文件係內部文件，即時要求同屬民記嘅委員會主席葉國謙處理文件失竊一事，葉一度扯火，鬧長毛攞咗梁份文件當執到。局長亦冇承認份文件究竟係咪來自保安局，話政府會因應議員嘅興趣提供資料，啲資料點用，問同唔問，發問方式點拿捏，都係由議員自行決定喎。