中環出更：啟剛率青聯巴黎「朝聖」
巴黎係藝術家天堂，時尚人的「聖地」，香港青年聯會（青聯）主席霍啟剛（Kenneth）都話好仰慕，早前率領二十多位青聯成員考察當地藝術文化。身兼團長嘅青聯副秘書長林玉茵（Maya）刻意唔跟旅遊天書路線，帶大家穿梭大街小巷，參觀修復古董雨傘及銀器工場，又到訪法國時尚女王香奈兒（CoCo Chanel）嘅故居。
巴黎雲集大小博物館，藝術氣氛甚濃，而走進小巷，驚喜更多。Maya發現巴黎有條藝術小街，聚集咗一批「國寶級工匠」，係法國政府以超平租金保育幾近失傳嘅藝術文化。Maya帶隊去到一間古董雨傘店，其中一位大師級工匠連十八世紀古董傘都懂得修復。最難得係大師唔自私，不斷招收年輕人做徒弟，將工藝傳承下去。
青聯成員發現店內原來有古董雨傘出售，好雀躍，紛紛影相留念。最貴嘅一把雨傘，叫價高達一百萬港元，足夠畀首期買層樓喇。睇完古董雨傘，一行人之後轉下口味參觀銀器工場。工匠們又係非一般叻人，懂得修復皇室銀器，大小精緻餐具及廚具，都靠佢哋雙手「死而復生」。
亦了解投資機遇
除咗考察文化，青聯成員又趁機了解投資法國的機遇。當地專員就推介佢哋投資酒莊，或是在法國南部買樓喎。臨走前，名譽團長Kenneth請食飯，揀咗一間由城堡改建而成嘅法國餐廳，眾人一於唔客氣，食到捧住個肚離開。
卓妮