政情：葉劉倡通識讓路還原歷史
七一佔中臨近，究竟通識科教師應否及點樣教導學生有關嘅「佔領中環」課題，喺學界同政界都引起熱論。做過保安局局長嘅行政會議兼立法會議員葉劉淑儀，就直情建議取消通識科作為必修科嘅資格，等學校有權選擇教定唔教、家長同學生有權選擇讀定唔讀。不過葉太背後嘅理據就同佔中無關，而係覺得通識科應該讓路畀歷史科或文學科。
葉太尋日出席一間中學畢業禮時，憶述佢喺加入政府前曾經做過老師，但只係教咗一年咁大把，但最近喺街上遇番當年嘅學生，對方居然仲認得佢，而且主動上前向佢講多謝添，證明為人師表，對學生嘅影響真係可以好深遠。
新一代不了解國際形勢
學貫中西嘅葉太又話，以前讀書要學文史結禮，但自從港府喺○七年取消範文科目後，選讀中西史或文學科嘅學生就愈嚟愈少，搞到依家啲畢業生普遍對自己國家同國際形勢都唔了解，中英文水平亦每況愈下。佢認為港府未來一定要認真檢討呢個問題，將爭議多多嘅通識科改做選修科目，將中國歷史、世界歷史、中國文學及英國文學轉做必修科。