運輸及房屋局局長張炳良最近頻頻「爆鑊」，先有南丫海難調查被指護短、高鐵工程延誤被指隱瞞、喺地區興建「插針樓」又被多個區議會鬧，據聞佢負責嘅另一項政策地區巴士重組，亦喺多個區面臨「甩轆」。多個建制派政團不滿當局口講就係「重組」，實際上就係「有減無加」，「冇商冇量」，想「霸王硬上弓」削多條巴士路線，影響當區居民利益，佢哋好難支持。當中以新界西嘅元朗區同新界東嘅沙田、兩個人口最多嘅地區反對聲音最大，隨時反枱收場。
據聞港府高層見到地區再次失控，決定以「一手軟、一手硬」應對。軟方面就係押後巴士路線重組時間表慢慢傾，希望傾出共識。硬方面就出撒手鐧，將重組計劃成敗與七一授勳掛鈎。消息指，部分建制派政團早前喺區議會討論巴士路線重組時，仲激過激進泛民，又示威搗亂，又向官員掟嘢，但轉嗰頭佢哋又同政府扮晒老友，要求向佢哋啲成員頒授太平紳士或其他勳章名銜，做法令港府高層側目。如果有個別政黨或政團喺今年七一授勳名單上「零收穫」，大家毋須感到奇怪。