政情：梁敬國爆紅 阿蘇好帶挈
商務及經濟發展局副局長梁敬國（Godfrey）最近人氣急升，立法會主席曾鈺成早前喺立法會會議唔認得佢固然係藥引，當然也要Godfrey嘅上司、商經局局長蘇錦樑好帶挈，當日要佢頂更出席會議，先至有呢個極速提升知名度嘅契機，事隔兩日後，Greg蘇疑再次故技重施，又要Godfrey頂更出席Greg蘇所屬政黨舉行嘅活動，不過今次Godfrey學精咗，一來識得多謝曾鈺成令佢「通街爆紅、一朝成名」，二來又識自嘲開場白就問大家係咪識自己，算係為自己「正名」同攞返個尾彩嘞！
自嘲「你哋識我嘛」
曾鈺成唔認得Godfrey連日成為政圈熱話，Godfrey尋日趁出席民建聯大埔辦事處開幕禮時，終於有機會現身說法，佢喺開場白致詞時先問在場嘉賓「你哋識我嘛」，以一招自嘲打開序幕，其後被傳媒追訪時笑言「小事一樁，何足掛齒」，直言完全冇唔開心，隨後更多謝曾鈺成令佢「通街爆紅、一朝成名」咁話。
不過客觀事實擺在眼前，唔少政界中人嘅印象中，Greg蘇同商經局政治助理陳百里不時「行孖咇」出席活動，Godfrey反而成日形單影隻咁。
落力護主 「天公地道」
Godfrey無對此怨天怨地，反而落力護主強調三人係工作團隊、互有分工，當日頂更出席會議更係天公地道添。至於點解Greg蘇尋日連「娘家」活動都唔畀面出席，有Greg蘇身邊人代為解畫話，Greg蘇尋日朝早要同加拿大國際貿易部部長進行閉門會面喎。
有政界中人話，Godfrey今次其實係因禍得福，所以不必對此太上心，因為Greg蘇○八年出任副局長初期一樣冇乜人識，翌年爆出「遞卡片為菲傭續約」風波，連續畀人炮轟咗一輪先一炮而紅，相比下，Godfrey算係以最低成本取得最大效益嘞。
不過一波平息一波又起，立法會會計界議員梁繼昌（Kenneth）爆料話，自己都唔識Godfrey，加上Greg蘇同陳百里二人從來冇同佢打過招呼，難怪Kenneth酸溜溜話，可能商經局從來唔需要泛民啲票喎。還記得Greg蘇早前免費電視風波已畀黨內中人鬧爆唔事前交流，依家對溫和泛民嘅支持票愛理不理，莫非Greg蘇想再「爆紅」，不過係畀人鬧爆到火紅火綠先知衰？