中環出更：樹根嫁女 勉「容忍 支持 欣賞」
立法會議員鍾樹根堪稱建制派新一代「重炮手」，除咗向泛民發炮絕不留口之外，又曾以「鍾式英文」鬧爆港鐵行政總裁韋達誠喺日日辦公室「尖明（dreaming）」、公開叫港視主席王維基「收皮喇」、以及直斥特區管治「肯肯定」有問題等。但尋晚佢出席一項活動時就突轉死性，致詞時語重心長咁強調大家要互相容忍、支持同欣賞，原來尋日係佢榮升岳父、女兒出嫁嘅大好日子，自然同佢喺立法會開會時嘅口臉完全唔同！
惡形惡相 頓變溫柔
樹根愛女尋日分兩場宴請親戚、政界友好和地區領袖，下午首先先喺屬於一級歷史建築物嘅跑馬地聖瑪加利大教堂舉行西式婚禮，喺立法會鬧人時惡形惡相嘅樹根，打上暗紅色花紋煲呔同以橙色主色嘅襟花，即係成個溫柔晒。佢徐徐拖住愛女步入教堂，場面感人。
晚上佢哋轉往山光道馬會會所擺喜酒，樹根多名黨友同政界友好都有到場祝賀。樹根上台致辭時祝願一對新人白頭到老，贏得台下嘉賓連串掌聲。
卓妮