學民思潮召集人黃之鋒早幾日同兩名成員去台北，上周五仲同六四學運領袖王丹、反服貿學生領袖陳為廷見面。點知見面之後，黃之鋒跟住嗰兩日就懷疑被人跟蹤，由酒店跟到捷運，一邊跟一邊用手機影佢哋相，引述對方聲稱想偷拍到佢出入夜店。不過，佢哋尋日已經頂唔順，話擔心安全受威脅，寧願提早幾個鐘飛返香港喎。
黃之鋒喺社交網站貼文，先係話有人直接打電話去佢酒店房間，用普通話邀請佢做訪問，佢質疑點解有人知道佢住處。到佢哋前日出外觀光，踏出酒店就見到一名灰衫男子跟住佢哋，由便利店跟到捷運站，對方一直用手機拍佢，又用廣東話傾偈，返到酒店又有黑衫男子攞手機影佢。
點知尋日朝早出門時，黃之鋒又見到灰衫男子，於是上前質問，對方話係受「香港客戶」委託，提供埋黃之鋒酒店地址，希望可以偷拍到佢出入夜店等畫面喎。佢哋擔心人身安全，原定尋晚十點先走，改為下午兩點就返港。黃之鋒話，如果有人想影佢相唔使咁麻煩，講聲就得嘞。