政情：中環出更：拉布累長者苦等剝牙驗眼
去年施政報告推出社區重點項目計劃，各區議會可以獲一億元撥款，用作改善區內設施或其他用途。葵青區議會半年前開會後決定向居民提供牙科等社區健康服務，但主席方平尋日投訴，雖然撥款喺區議會破天荒咁得到所有黨派支持，但就受立法會「拉布」戰影響，遲遲唔可以擺上財務委員會表決，令區內老人家等了又等。
區議員被「追數」
方平同區議員譚惠珍嘅聯合辦事處尋日正式開幕，譚惠珍話，區內唔少老人家不時去佢哋嘅議員辦事處，問佢幾時可以免費剝牙同驗眼，搞到佢都唔知可以點答。「拉布」戰都唔知幾時結束，睇嚟佢哋都係要繼續接受老人家查詢喇。
有傳譚惠珍做埋今屆唔再連任，而委任區議員方平就係轉戰直選接替佢個議席，咁啱兩人選擇喺青衣長安邨開設聯合辦事處，唔知傳聞係咪真呢？方平話，仲未諗下屆係咪轉戰直選，但就話自己愈做區議員愈投入。譚惠珍話，無諗住咁快退休，又話自從方平決定落地區幫手，佢即時可以派足千四隻糭畀街坊，比以前多咗足足兩倍喎。
卓妮