政情：中環出更：菁青小故事大道理
年輕人多吸取前人成功經驗，可以行少好多冤枉路。百仁基金日前又舉辦菁青相惜分享會，副主席羅詠詩（Anthea）聯同香港藝術發展局主席王英偉兒子兼唱作人王梓軒及香港青年聯會委員嚴康樂，去到元朗一間小學同學生分享人生經歷和成功心得。Anthea自爆，中學一件瘀事改變咗佢人生，而王梓軒則應學生要求即席獻唱，令學生好投入，氣氛高漲。
身為會計師嘅Anthea話，從來冇諗過從事會計行業，因為佢自細嘅志願係做時裝設計師。話說佢中學時有次上家政堂學車衫，當完成咗件作品後，諗住畀同學仔睇吓自己手工有幾好啦，點知一拎起，竟然將自己條校裙都掀起埋，發現原來錯手將作品和身上嘅校裙車埋一齊，尷尬到不得了。經過呢件事，佢深明興趣同理想有時唔一定能夠實現，換個角度可能會發掘到自己其他長處。
王梓軒即席獻唱
至於王梓軒就話，佢求學時期為咗唱歌，在閣樓自建錄音室，將咪駁落電腦度就唱歌，能夠堅持興趣至今，皆因佢知道呢份正能量可以影響別人。三年前，佢喺一個商場獻唱時，有個抱住BB嘅媽咪握住佢手，同佢講曾一度因為誕下弱智小孩而諗過自殺，但聽完佢嘅歌曲後心情平復，並打消自殺念頭，令佢驚覺音樂嘅影響力可以咁大咁正面，在場學生就趁機要求佢即席獻唱，反應熱烈。
嚴康樂就透露自己細個好百厭，仲因為唔鍾意讀書而揀修美術，點知結果要讀一堆藝術史，後來仲放棄埋學業出來工作添！後來佢因為自覺學歷不高，於是重返校園，佢勸勉年輕人先完成學業再追求理想，因為愈遲讀書代價和負擔愈大喎。
卓妮