腳患入屯院 老翁術後暴斃
「入院只係做腳部手術，又無併發症，點解突然死咗？」八旬老伯上月因右腳持續腫痛到屯門醫院留醫，檢查後發現腳部軟組織發炎需接受手術。病人術後精神不差，與家人對答如流，豈料本月四日、即術後九日病情急變，搶救後不治。家人不明白一項簡單手術為何奪去病人性命，醫生又無交代死因。與老伴相依逾五十年的死者太太哽咽稱︰「係我叫佢入院，好似我推咗佢去死，要幫老公攞返公道。」院方指個案已交死因庭。
術後仍精神 病情突惡化
八十二歲葉祥遠上月十九日因右腳持續腫痛，由家中步行到屯院急症室求醫。醫生檢查後心肺功能正常，但X光顯示右腳有發炎跡像，即時安排留院。葉伯的二兒子傷心憶述，父親去得不明不白。
留醫初期輕微發燒，化驗結果顯示並非感染食肉菌，亦沒有細菌入血。醫生為免右腳的發炎擴散，安排病人上月廿五日接受手術切除右腳壞死組織，從無提及手術風險。病人術後一直很精神，與家人有講有笑。葉先生說，父親術後仍有發燒，醫生處方抗生素後退燒，還以為快將出院。
豈料，葉祥遠於本月四日病情急劇惡化。葉先生激動憶述︰「早上九時醫院來電話稱爸爸情況好急，叫家人快啲到醫院。我哋廿分鐘後趕到病房，護士話爸爸過咗身。醫生護士停晒手，話過多一小時身體就會凍。他不滿醫生沒有解釋父親死因：「我哋兩次主動問，佢先答做咗嘢，用咗強心針。答案好似交差，仲話醫者父母心，我想知點解爸爸會死！」
葉太哽咽稱︰「佢好地地自己行入院，做完手術一直好精神，沒有併發症，死前一日探佢都無事，仲好好胃口，唔明點解會突然死咗？老公死得不明不白，要幫佢攞返公道。」
院方指染金黃葡萄球菌
屯門醫院回覆指，男病人本身患高血壓及心臟病，因右腿軟組織感染發炎入院治療，處方抗生素及傷口護理治療，仍持續發燒，傷口出現含膿。醫生評估病情後安排進行手術，清理壞死組織。樣本化驗結果顯示，右腿染金黃葡萄球菌。病人術後繼續接受抗生素及傷口護理治療，維生指數及身體檢查均顯示正常，但仍有發燒，直至五月四日離世。
記者曾愷欣