政情：中環出更：闖立會「鳥籠」 麻雀被放生
唔少善信都趁早前佛誕放生積福，原來立法會秘書處日前都搞咗次放生，唔通同秘書長陳維安（Kenneth）食開齋有關？非也，原來秘書處放生嘅，喺早前誤飛咗入立法會會議廳嗰隻麻雀仔，而且仲有片為證添！
上個禮拜五下晝、立法會預算案拉布戰進入第四日期間，有一隻麻雀唔知點樣飛咗入外號「鳥籠」嘅會議廳，為唔少已經悶到發慌嘅議員增添番少少樂趣，紛紛攞部手機出嚟影隻雀仔。事後有唔少愛鳥之人好擔心隻雀嘅下場，擔心佢會餓死立法會或者畀啲議員悶死。
獲准留宿一晚
Kenneth尋日同卓妮講，隻雀最後冇悶死，但就真係悶到瞓低咗。話說當日休會後，秘書處職員原本想趕走隻雀，但竟然發現隻雀仔喺地下瞓着咗，為免擾雀清夢，佢哋決定等到第二朝先再捉番佢。結果隻雀仔翌日果然又喺會議廳內周圍飛，有醒目嘅職員決定熄晒會議廳內所有燈，淨係開住一道門，終於吸引到隻雀仔飛番出嚟，最後喺立法會大樓三樓束手就擒。秘書處職員最後將雀仔放入黑色膠袋，再攞出去立法會廣場外放生，並拍埋片紀錄呢個難得嘅一刻！
卓妮