一項調查發現，新加坡受訪青年不論在溝通技巧、國際視野、人際關係、學歷及工作能力五方面的信心，均較本港受訪學生高。
本港受訪青年只傾向較認同自己的學歷具競爭力，但自認為最欠缺人際關係技巧。然而，依老朽看，本港青年欠缺的是國際視野，這也許如本報《正論》所揭示的「青年看不見未來，香港找不到出路」有關。
香港新生代的目光，一代不如一代。七十年代後，香港經濟騰飛，物質主義掛帥，大學生奉行「四仔主義」，即置業（屋仔）、結婚（老婆仔\老公仔）、有車（車仔）、養狗（狗仔，亦有說是「BB仔」），此種生活態度被稱為「四仔主義」，反觀今日的大學生，竟有不少輪候公屋者，連「屋仔」也要與基層爭。
日前金融管理局總裁陳德霖仲話：依家價值六百萬元嘅住宅物業，仲可以問銀行借到七成按揭，青年人仍可以置到業。香港啲高官，向來唔知米價，更鍾意周不時隨口噏當秘笈，年薪逾九百萬元嘅陳總同月入三十萬嘅「中產財爺」鬍鬚曾同一個鼻孔呼吸，都係不食人間煙火，自然不知民間疾苦。阿哥，一個六百萬嘅「上車盤」，借七成，一次過都要畀成一百八十萬首期，若然還款期二十五年計，每月亦要供近二萬元，有幾多畢業嘅大學生供得起呢？
講真，大學畢業生即使搵到工，如果要還大學時借落嘅貸款，住埋父母屋企，一份萬多元甚至八、九千元嘅「糧」，用來搭車中午吃個快餐，分分鐘都未夠使，「青年上車盤六百萬元」，陳總──咪玩喇！香港之所以日漸沉淪，好明顯就係養埋一班「只知叫人食肉糜」嘅廢官！廢官、廢話、廢噏，自然不懂甚麼「修辭立其誠」！胡言亂語治港，香港點會人和政通？點會有運行？