原本獲政府委任為高鐵獨立專家小組主席嘅港大岩土工程講座教授李焯芬，因涉及利益衝突極速辭職，運輸及房屋局局長張炳良事後承認喺事件上「蝦碌」，冇聯想李焯芬同工程承辦商有關。李焯芬尋日出席佛誕活動時自言係佛教徒，本身諗住幫得人就幫，又以為政府有佢履歷，之後更回應到張炳良「蝦碌論」，直言話好唔鍾意蝦唔蝦碌嘅字眼。其實蝦碌又唔算特別貶義，莫非李焯芬因宗教關係，對於葷菜特別敏感？
