政情：老字號傳人 愛書法寫信
今時今日唔用手機嘅人已經好難搵，用毛筆寫信更加係少之又少。老字號粥麵店第二代傳人黃天，正係唔用手機兼且用書法寫信及字條嘅「奇人」，佢啱啱完成一本關於釣魚島嘅著作，厚厚一疊廿五萬字草稿都係用手寫。黃天笑稱，好多朋友收到佢嘅字條或信件都唔捨得丟棄添！
金銀業貿易場理事長張德熙太太兼博愛醫院前主席伍翠瑤（Jennifer）好欣賞黃天嘅才氣，多年前相識之後就當佢係寶，經常介紹佢畀朋友認識。
Jennifer一向致力推廣中國文化，亦係中國國情研習促進會創會會長。佢盛讚黃天唔似生意人，因為佢接手家族生意之前從事文化工作，國學及歷史知識好淵博，而且仲係釣魚島問題嘅權威添！
不「機」文化人
黃天笑笑口話，十幾年前別無選擇接手粥麵店，但佢仍唔放棄鑽研文化，依家每日三、四點前佢係生意人，然後就返屋企寫書，做返文化人，幾乎零應酬。由於生活簡單，所以唔用手機都冇問題吖！