政情：潘少想當年做議員好歎
勞聯主席潘兆平（潘少）接下勞工界前立法會議員李鳳英（英姐）嘅火棒，只係做咗立法會議員兩年，竟然搞到五勞七傷，仲希望時光倒流二十年，點解？潘少勁呻話，佢因為開會開得多，坐得耐，出現靜脈曲張，仲變成高血壓、高血糖及高尿酸「三高」人士，總之身體付出好大代價，認真誇張。所以佢話，好希望做廿年前嘅議員，據聞當年班議員下午兩點半開會，五點鐘就走得，仲有時間可以入馬場玩喎！
食無定時變「三高」人士
潘少憶述，第一年入立會嗰陣，因為係新丁，事事跟到足，工作忙，壓力又大，加上食無定時，所以就搞到血壓、血糖同尿酸都過高，褲頭仲闊咗成吋添。直到第二年，潘少因為坐得多，所以出現靜脈曲張嘅徵狀。仲有呀，潘少自爆英文唔叻，睇立法會英文文件要用比人哋更長時間，所以佢惟有將勤補拙，趁立法會拉布期間用智能手機溫習會議嘅文件，閒時又會請教英姐。總之為咗打好呢份工，付出好多時間及精力。
潘少講講吓話，最恨做廿年前嘅議員，皆因佢聽啲前輩講，廿年前嘅議員開會時間短好多，大部分會議都係返兩點半，放五點鐘，真係輕鬆又自在喎。不過時光冇得倒流，潘少都冇得諗咁多喇！所以佢都認命話，好彩無論工作幾咁繁忙，佢總算得到家人嘅諒解及勞聯兄弟嘅支持，所以先捱得過去。照咁講，咁佢下一屆會否再參選？佢話搞掂呢屆先算喎！好似冇乜心機咁。
政治生態不同難比較
其實今時唔同往日，根本冇得同廿年前比較，況且廿年前香港都仲未回歸，唔單止政治生態唔同，立法會議事氣氛都唔一樣。
依家市民要求高咗，做議員又真係辛苦咗，超級議員要走勻全香港唔在講啦，雙料議員經常要喺地區、議會兩邊走，功能界別議員就要不時同業界開會，否則就唔使諗競逐連任，難怪潘少入咗議會僅兩年就搞到五勞七傷。
廿年前仲係英國人治港，嗰時開會大部分時間都係講英文，如果真係畀佢做返廿年前嘅議員，佢會唔會又勁呻呢？所以話，做人咪成日想當年，展望將來啦！