中環出更：各界浴佛化解社會戾氣
近排香港負能量爆燈，尋日適逢佛誕假期，各界紛紛搞浴佛活動為社會化解戾氣。仁濟醫院主席蘇陳偉香（Susan）、新界社團聯會理事長陳勇及理工大學前校長潘宗光等人，尋日齊出席一個喺荃灣舉行嘅浴佛典禮暨嘉年華會。Susan話，雖然自己唔係佛教徒，但亦希望藉此活動散播正能量。
卓妮一去到會場，見到一班仁濟董事局成員聚埋一齊，好興奮咁互傳手上一件新玩意，細心一看，原來係吳國榮總理新買嘅google glass。呢副價值一千五百蚊美金嘅眼鏡，可以透過語音指示錄影或拍攝，仲可即時上載至社交網絡，目前喺香港仲未有得賣，難怪吸引仁濟副主席林煒珊、總理陳李詠詩等人爭住試戴。
鄭李華熙 盡孝禮佛
不過呢個新科技被指高度侵犯私隱，吳國榮就話唔驚畀人話偷拍，事關佢影相前一定會問過人哋先，仲會將指示讀出聲，務求大家知道佢做緊乜嘢。
講番嘉年華現場，以素食區最有人氣，卓妮見Susan同總理鄭李華熙（Winnie）及黃美斯食得好開心，原來佢哋食緊香煎牛蒡同猴頭菇。Susan話自己都有食牛蒡嘅習慣。話說有次佢食完糖水驗血糖，見到個指數差啲超標，後來朋友介紹將牛蒡混合菊花及杞子攪碎沖麥皮當早餐，食咗一個月後再去飲糖水驗血糖，發現情況有改善，所以依家就一星期食一次當養生。本身係佛教徒嘅Winnie自細已跟隨家人信佛，不過食唔食素就好隨心，佢間中會不定期食齋，同埋帶媽媽一齊去佛教聖地浙江普陀山朝聖，盡孝兼禮佛，一舉兩得。
卓妮