政府宣傳「大嘥鬼」算係深入民心，但依然有好多人浪費食物，出名環保嘅天文台前台長林超英（黑英）尋日就喺網誌《草雲居》，分享早前去一間連鎖中式食店柯打「一蚊雞」嘅經歷，發現好多人都「爭着數、怕蝕底」，只識得求諸人，而冇求諸己。
黑英話，當日同囝囝食晚飯，因應食量本來叫咗半隻「一蚊雞」，但對方都係嚟咗成隻，由於只係多收五毫，所以唔好意思叫人退番。既然係咁，佢就認為有責任，寧願唔好嘥，兩個人盡力食晒隻雞，避免製造廚餘。點知埋單走人之際，先至發現好多枱嘅客人都食唔晒隻雞，有啲甚至只食得三分之一，有啲淨係食咗幾件。
黑英好感慨話，好多人認為一蚊一隻雞，唔點就蝕底，所以就唔理三七廿一，點咗先算，但食咗其他餸菜，肚飽食唔落，最終食得一兩件。
本來一蚊雞係好事，但因為人嘅貪念，就將「善」化做影響眾人之「惡」，而放諸整個社會，好多人都係因為「抵」而買嘢，只為自己方便、着數，最終小惡積累成大惡，冇得怨天尤人，認為大家只要諗諗垃圾係自己製造，自己就係問題根源，做好源頭減廢就得嘞。