政情：金刀梁夫婦 劏出田雞慌
近年興起一股素食風氣，唔少人都開始為健康而養成戒食肉類嘅習慣。香港大學校務委員會主席梁智鴻（金刀梁）同太太梁馮令儀，雖然都唔係素食者，但原來亦有一種最怕食嘅肉類，就係田雞喇！
發現勁含寄生蟲
話說手術技藝高超嘅金刀梁出身醫學世家，而有「放射科女王」之稱嘅梁太亦係醫科出身，仲係香港放射科醫學院嘅創會會長。佢哋喺讀書時代經常都要解剖老鼠、曱甴、狗鯊同田雞等昆蟲同動物。講起呢啲回憶，梁太話劏過咁多品種之後，知道田雞嘅寄生蟲真係好多，而且田雞死咗，啲寄生蟲都仲未死，真係好恐怖，所以佢同老公一直都唔敢食田雞咁話。
梁太又話，其實飲食習慣係靠自細培養出來，好似佢就因為媽媽同家人都唔食羊，所以佢長大後亦自然習慣咗唔食羊肉。如果家人長期煮開某一類餸，好似蒸魚或者蒸肉餅咁，食開一排之後突然冇得食，就會特別容易諗起想食。