政情：硬銷亞博館鬍鬚曾阿Q
位於機場附近嘅亞洲國際博覽館（亞博館）係本港第二個會議展覽場地，有七萬平方米可租用面積，比起灣仔嘅香港會議及展覽中心（會展）多出幾千平方米，但由於位置非常偏僻，加上知名度遠遠不及會展，所以參展商同買家數字就比唔上會展喇。唔知係咪見到亞博館做足咁多年都係一潭死水，財政司司長曾俊華（鬍鬚曾）尋日就特別喺每周網誌用二千字硬銷亞博館近年發展多元化業務，擺明就係自我感覺良好。
鬍鬚曾話，雖然唔少大型國際展覽都要用好幾年時間籌備，當營辦商同會展一旦建立默契、參展商及買家形成習慣，要佢哋改去其他地方參展並唔容易，但亞博館至今只係營運咗八年，就已經三度獲旅遊界權威雜誌選為亞洲最佳會議展覽中心嘅頭三位，今年更加躍升至第二位，全年有五十二日全館爆滿，相比兩年前十隻手指都數得晒算係唔錯喇。咁嘅數字都叫做唔錯，鬍鬚曾嘅要求認真低。
展覽做唔住 吹噓最「多魚」
鬍鬚曾自我陶醉嘅，仲有亞博館更不時租出約有八千平方米嘅大廳，用作舉行容納到五千幾人嘅大型中式宴會，廚房可同時清蒸一百八十條魚。為咗保證食物質素，亞博館嘅大廚甚至特別鑽研蒸魚嘅方法，包括計算每圍同廚房嘅距離，以及喺場地設立中途站，等侍應可以適時加入蔥絲熟油等配料，確保每條魚都以最佳狀態上枱。
鬍鬚曾講食就講到天花龍鳳，如果亞博館真係咁好，相信唔使佢硬銷，參展商自然會蜂湧去幫襯，會展亦唔會因為不敷應用而多年來爭取擴建第三期，業界亦唔會要求增加展覽場地，可惜政府聽唔入耳。如果亞博館真係咁好，咁點解港府每年嘅重要酒會，例如新春酒會、升旗禮酒會等，都硬要選擇灣仔會展舉行呢？為何唔帶頭到亞博館舉行？說穿了咪係地點問題囉！
至於鬍鬚曾舉例話早幾年上海世博嘅電子版巨型《清明上河圖》搬到香港亞博館展出，令市民發現亞博館唔係想像中遙不可及。但實情只係《清明上河圖》吸引力大，市民先至焗住花要去到咁遠啫，當時已有市民批評位置遍遠兼且交通費貴，唔知鬍鬚曾瞓醒未呢？