政情：中環出更：海怡傳開Outlet補選三黨再鬥過
要選贏區議會議席，一定要過五關斬六將，贏咗仲要做多啲。好似最近傳出鴨脷洲海怡西商場會變成主打旅客嘅大型Outlet，令居民好擔心，新鮮出爐嘅新民黨海怡西區議員陳家珮（Judy）當然落力，即刻約見大業主商討解決辦法，但連選舉落敗嘅民主黨同人民力量，都派人協助居民，睇嚟海怡西商場開Outlet呢個議題，已成為政黨兵家必爭之地。
Judy上星期已經率先聯同部分商戶約見大業主，希望業主盡快公布商場翻新計劃，等居民唔使咁擔心。而選舉中落敗嘅人力袁彌明，都去咗海怡擺街站收集意見，白鴿黨就比較輸蝕，完全唔見單仲偕蹤影，只得南區區議員柴文瀚關注事件。選舉過後仲見到三黨齊集海怡大鬥法，海怡居民真係唔知是福是禍。
葉劉認有黨員「淡出」
講起新民黨，最近有傳該黨爆發退黨潮，該黨主席葉劉淑儀前日回應話，有人走唔出奇。正當大家以為佢承認有人退黨時，佢尋日就澄清話，一個黨有黨員出出入入好正常，該黨的確有人走，有人因為移民要離開香港，亦有人要去外地工作，好似該黨執委嘅關詠軒同吳有家，兩人都無遞交退黨信，只係關詠軒同佢講過因健康理由而淡出新民黨，唔想太專注黨務。不過，到底有幾多人「淡出黨務」而唔係退黨，葉太就話未有確實數目。
卓妮